|  |
|
|
|
Миянлы уиаoн отсасьoны...
Автор: Михаил ЛАДАНОВ, "Коми му"
Дата публикации: 21.05.2007
Язык статьи:
Тöрыт вöлi музейяслöн международнöй лун. Россияысь музейяслöн союзöн веськöдлысь Михаил Борисович Пиотровский чолöмалöма Комиысь Национальнöй музейын уджалысьясöс налöн профессиональнöй праздникöн. А тайö учреждениеас зiльысьяс, кодъяслöн веськöдлысьыс Ирина Николаевна Котылева, тшöтш жö ыстöмаöсь чолöмалана пöсь кывъяс странаса 60 музейö, кодъяскöд кутöныг топыд йитöдъяс.
Но-а кыдзи Комиын пасйисны тайö аслыспöлöс праздниксö? Национальнöй музейöн веськöдлысь Ирина Котылева тадз вочавидзис:
—Медводз Сыктывкарын нуöдiм семинар, кытчö чукöртчылiсны республикаысь государственнöй да муниципальнöй музейясын уджалысьяс. Ставыс вöлi кызь сайö морт. Комиысь нывбабаяслöн палатакöд öтвылысь дасьтiм «Семьялöн альбом» выставка. Мукöдторсö сэсся оглыддьöдлы.
Но век жö медся тöдчанаыс — рыт, кöнi ыдждöдлiм ... ошкöс. Республикаса вöр-валысь озырлун да гöгöртас видзан министерство миян музейлы козьналiс тайö зверыслысь чучеласö. Веськыда кö, тайö ыджыд козин, кодлöн доныс 50 сюрс шайт. Асьным татшöмсö, дерт, ньöбны ог вермöй. Вывтi дона.
Тöдчöда, водзтi комияс оштö ен туйö пуктылöмаöсь, быд ногыс ыдждöдлöмаöсь. Жаль, но вочасöн важся оласногыс да традицияясыс бырöмаöсь. Тайö зверыскöд йитчöм нэмöвöйся обрядьясыс öнi кольöмаöсь сöмын хантылöн да мансилöн. Та вöсна на ног и вöчим. Музейö воысь гöсьтьяс воськовтiсны öдзöс порог да сы сайын куйлысь чер вомöн. Важся обрядьясын урчитöм ногöн пармаса кöзяинлöн чучела гöгöр ворсiм, йöктiм, шмонитiм, медым ош миянöс прöститас да аслас выль керкаын бура овмöдчас.
Пасья, Европаса музейясын зверь-пöтка мыгöрьясыс - талун медшöр экспонатьяс, кодьяслöн зэв ыджыд тöдчанлуныс наукаын. Сiдз, Францияса вöрьясын öнi ошкыс абу нин. Та вöсна зверлысь чучеласö ньöбöны Россияысь. Oд музейö волысьяслы колö петкöдлыны ошсö, висьтавны сы йылысь... Миян жö музейын, шуам, эмöсь косьтöм турун-быдмöгьяс, кодьясöс чукöртлöмаöсь 1911 воын на. Эмöсь и мамонтлöн, рудöгувса (пещернöй) ошлöн, носороглöн лыясыс...
—Ирина Николаевна, а тшöкыда-ö тадзисö отсасьöны Национальнöй музейлы?
—А миян уна бур ёрт да отсасьысь. Натöг талун музей тыр-бура уджавны да водзö сöвмыны öдвакö вермас. Медводз аттьöала Сыктывкарса вина-водка вöчан заводöн веськöдлысьясöс. Налöн отсöгöн 2006 воö ми ньöбим нэмöвöйся зэв шоч книгаяс. На лыдын Чилимдiнса нималана небöгьяс. Сэсся лэдзим «Степан Пермский. Путь через века» диск. Дасьтiм и «Степан Пермский. Непрочитанные письмена» выставка. И нöшта на öткымын проект.
Кольöм во «Севергазпром» ВАК-лöн сьöм вылö миян музей лэдзис «По пути Стефана Пермского» туйиндалысь.
Бур йитöдьяс гöрддзасисны и Сыктывкарса кампет-преник вöчан фабрикакöд. Кöджпомса детдомын олысьяскöд тшöкыда аддзысьлам да, вермытöм челядьлы юмовторьясыслоöны бур козинöн.
Кольöм воö жö Перымса Степан моз Коломнасянь воöдчим Емдiн сиктöдз. Туйыс вöлi кузь.
Сiйöс вуджны миянлы отсалiсны Россияса войтырöс дорьян да виччысьтöмторйысь видзан министерстволöн Комиын главнöй управление да республикаса войтырöс дорьян да виччысьтöмторйысь видзан комитет, сетiсны мотора пыжьяс, мукöд коланатор, миянкöд мунiсны и спасательяс.
Ми, Национальнöй музейын уджалысьяс, дасьтiм «Плетение словес» проект. Владимир Потанинлöн фонд сiйöс вылö доньялiс да сетiс миянлы грант. Тайö сьöм вылас Кöджпомса детдомысь челядькöд öтвылысь шуим котыртны сiдз шусяна интерактивнöй выставка. Сэнi лоöны аслыспöлöс гырысь книгаяс, кодьясöс позьö лыддьыны, весиг киад найöс босьтлыны. Выставкасö мöвпалам восьтыны таво декабрын.
Oнi дасьтам «Псалтырсянь компьютерöдз» выставка. Сiйöс сиöма Коми муын школалöн историялы. Тöданныд-ö, мый медводдзаысь коми челядьöс заводитöмаöсь велöдны Перымса Степан дырйи манастырьясын? Та бöрын нин вöлi котыртöма церковно-приходскöй школа. Сiдз шусяна светскöй велöдчанiн Комиын воссьöма сöмын 19-öд нэм помын. Oнiя ныв-зон оз нин тöдны, кутшöм паськöм новлiсны кольöм нэмлöн 60-70-öд воясö сöветскöй школаын велöдчысьяс. А босьтны кö сiйö жö пионерьяслысь да комсомолечьяслысь котырьяссö...
— Ирина Николаевна, а мый майшöдлö?
— Oнi выльмöдам нималана купеч Сухановлысь керкасö. Сьöмсö сетöны федеральнöй да республикаса бюджетьясысь. Уна нин вöчöма. Медводдза судтаас восьтам научнöй библиотека, кöнi лоö 18-öд нэмсянь чукöртöм быд сикас небöгыс. Зэв озыр миян краеведческöй библиотека. Сэнi жö лоö и интернет-кафе. Но став мöвпыштöмторсö збыльмöдöм могысь ёна на колö уджавны.
Национальнöй музейын зiльысьясöс майшöдлö, мый вочасöн бырö коми сиктын олысьяслöн важся паськöм, эмбур, мукöдтор. Шуам, кольöм нэмлöн 20-30-öд воясö пуысь вöчöм улöсьяс, лабичьяс, этажеркаяс, часiяс... Вошöны Удораын, Кулöмдiнын да Чилимдiнын ки помысь гижöм орд библиотекаяс. Комиö волiгöн Россияысь культураса министр Александр Соколов найöс вылö доньялiс. Веськыда кö, библиотекаясыслöн доныс абу. Вöлi эськö вывтi бур, войтыр кö найöс козьналiсны миянлы.
Эм позянлуныс да окота аттьöавны Национальнöй музейын миянлысь уджалысьясöс зiльöмысь, водзмöстчöмысь... А öд сiдз шусяна смотрительлöн удждоныс сöмын 2-3 сюрс шайт. Кыдзи тайö сьöм вылас талун позьö овны? Но та вылö видзöдтöг йöзыс сьöлöмсяньыс уджалöны. Матысса луньясö нуöдам «Музейлöн вой» чукöртчылöм. История, этнография да став мукöд отделын уджалысьяс шызисны жö, ми пö бокö ог кольччöй. А öд войнад нöшта на сьöкыд зiльнытö.
Миян музейын уджалöны öбраз, кабала, пу да дöра ловзьöдысьвыльмöдысь реставраторьяс. Татшöмьясыс сэсся республикаын абуöсь.
Сiдзжö танi, позьö шуны, пуöмöн пуö и наукаын туясян удж. Кандидатлысь диссертация меысь öтдор дорйис Ирина Моисеева, öнi дасьтысьö Светлана Бондура. Тшöкыда нуöдам научнöй конференцияяс. Отуввезйын эм асланым лист бок. Йöзöдам и «Музей краеведения» сборник.
Источник: "Коми му"
|
|
|
|
|
|
 |
|
|
РЕКЛАМА
|
|
|
