|  |
Новости на национальных языках |
|
|
Варвара НИКИТИНА: Медводдза нывбаба-каскадёр
16.02.2010
Каскадёрлöн удж ёнджыка лöсялö мужичöйяслы. «Тайö зэв романтичнöй профессия», - лыддьö Россияса медводдза нывбаба-каскадёр Варвара Никитина. Каскадёрöн лоны ныв-бабаястö оз на и босьтны, но ветлöм-мунöм мортыд из улысь аддзас. Oнi сiйö снимайтчö киноясын, вöчö сьöкыд трюкъяс, пырö каскадёръяслöн Россияса ассоциацияö.
Мыйсянь ставыс заводитчöма? Ичöтдырйиыс Варвара кöсйöма лоны каскадёрöн. Вит арöсын нин ветлöдлöма художественнöй гимнастика вылö. Сэки сылы и пысасьöма «Варька-каскадёрка» ним. Челядь вöлi чукöртчöмаöсь спортивнöй залö тренировкаяс вылö. Oти нывка шыбитöма булавасö нёль метр вывлань да стенмас кыдзкö öшйöма. Медым сiйöс судзöдны, Варвара кайöма балкон вылö да мунöма спортзаллöн векньыд бордюрöд. Кор локтöма тренерыс да аддзöма кайöм нылöс, зэв ёна повзьöма. Сэксянь и лоöма Варвара «Варька-каскадёркаöн».
— Нывлы кö шуан, мый сiйö принцесса — сiйö лоö сыöн. Кор ме лои «Варька-каскадёркаöн», кутi сэтшöмöн и лоны. Школа помалöм бöрын мунi «Мосфильмö». Дерт, медводз мекöд и сёрнитны эз кутны, сэки öд нывбаба-каскадёръясыд эз на вöвны, — шуö Варвара.
Медым не дöзмöдны бать-мамсö, ныв мунöма велöдчыны горнöй институтö. Сэнi велöдчигас нин аддзöма каскадёръяслöн курсъяс йылысь юöр. Варвара дзик пыр и локтöма сэтчö. Сы кындзи сюрс гöгöр морт на вöлöма, и ставнысö босьтöмаöсь. Быдöнöс эскöдöмаöсь, мый кутасны петкöдчыны киноын, но 90-öд воясад кино снимайтöмыд абу вöлi паськалöма. Вöлöмкö, тайö дон мынтöмöн спортивнöй курсъяс, но Варвараöс тайö абу повзьöдöма. Сэнi сiйö велöдчöма рукопашнöй тышкасьöмö, ньöввужйысь лыйсьыны.Во джын мысти тайö курсъяс вылас локтöма актёр, каскадёр да режиссёр Андрей Ростоцкий. Сылы, вöлöм, колöны «Зверобой» киноö каскадёръяс.
— Кузь сьöд юрсиöй да кузьмöс синмöй вöчисны менö индианка кодьöн. Тадз ме веськалi съёмочнöй площадка вылö. «Зверобойын» вöчи кокньыд трюкъяс — гуран вомöн чеччыштöм, пу вылысь усьöм. Сэки менö казялiсны да пондiсны корны то öтилаö, то мöдлаö. Вочасöн пырöдчи каскадёр уджö, — шуö Варвара.
Сэкъя кадö каскадёр-нывъястö ёна дзескöдiсны: этшаджык мынтiсны, эз пасйыны титръясö. Варвара шуö, быд трюк дорö пö кывкутöмöн дасьтыси, öд мыйкö кö эз артмы, шулiсны: «Мый нывбабаыд вермас вöчны?!» А мужичöй кö эз сяммы, мыжанас вöлi поводдя либö жугалöм тормоз.
— Сэки меным воис мöвп, чукöртны мукöд ныв-каскадёръяссö да вöчны миянлысь правояс доръян котыр. Тадзи чужис "VARVARA-STUNT". Бöрынджык тайö студияас пырöдчисны и мужичöйяс. Oнiя кадö нывбаба-каскадёрыд — абу нин шензьöданатор, — шуö Варвара Никитина.
Варвара öнi юрнуöдö каскадёръяслöн войтыркостса «Бригантина» фестивальöн, сiйö медводдза нывбаба, кодi пырö каскадёръяслöн профессиональнöй ассоциацияö. Варвара сетiс позянлун мукöдлы бöрйыны тайö удж сикассö, öд öнiя кадö нывлы каскадёрöн лоны кокньыдджык.
Автор/источник: Йолога
|
|
|
|
|
|
 |
|
|
РЕКЛАМА
|
|
|
