|  |
Новости на национальных языках |
|
|
9 толэзь чоже Удмуртиын 240 пала коррупциен герзаськем йыружъес пусъемын
09.11.2009
Быдэс кылем ар чоже 270 учыръес шараямын вал. Данакез соос кузьмаськонэн, ужоскетъесты быдэсъянэн герзаськемын. Со сярысь ивортиз Удмуртиысь прокуратура бордын ужась следствиосъя управленилэн кивалтисез Владимир Никешкин.
Коррупцие выем чиновник кызьы нимаз адямиослы, озьы ик быдэс кунлы уксеен но лулпушен герзаськем ыштонъес вае. Со кунлэсь экономикая кышкыттэмлыксэ быдтэ но торлыкъеслы осконэз уськытэ. 2007-ти арысь куарусенысен кутскыса, ужоскетъесты быдэсъянэн герзаськем 400 пала уголовной ужъес жутэмын, коррупциен — 200-лэсь уно. Шараямын кузьмаськон но взятка басьтон учыръес. Уголовной кылкутон улэ кыскемъес полын вань бадзым кивалтисьес но, — шуиз Владимир Никешкин. Солэн верамезъя, коррупциен но ужоскетъесты быдэсъянэн герзаськем йыружъес тужгес трос пусъемын Дэри еросын. Туэ кылкутон улэ шедизы архитектурая, ваньбур кусыпъесъя, лэсьтиськонъя управлениослэн кивалтисьессы, озьы ик ветеринария езэтлэн кивалтисез. Куд-ог ужоскето муртъес пумысен эскерон ужъес азьланьтисько на. Чемгес шараясько выли дышетсконниосын ужасьес полын кузьым курон учыръес. Уноез зеч отметка пуктэм понна кузьым басьтонэз секыт каттиянэн уг лыдъяло. Нош рос-прос учконо ке, со туж кошкемыт йыруж, — пусйиз Владимир Никешкин. Солэн верамезъя, дышетисьес-взяточникъес дышетсконниысь ляб но азьтэм онерчиосты поттэм сяна, егитъеслы коррупционерлэсь психологизэ пычато. Берло кык ар чоже следствия управлениысь онерчиос нимаз инлыкъя улись-ужась 51 адямиос вылэ уголовной ужъес жутизы, соос полын 49 депутатъес вылэ. Пусъем йыружъес кузьмаськонэн, ваньбуретэн, выт тыронъя катрадлыкез тиянэн герзаськемын. Коррупциен нюръяськонын вормон понна, калык полын со сьод ужлы пумитъяськон мылкыд жутскыны кулэ. Мар веранэз огшоры адямиос сярысь, куке куд-ог кивалтисьес коррупцилы пумит султэм интые асьсэос кузьым ертисьеслы дурбасьто, — шуиз следствиосъя управленилэн кивалтисез. Элькунын сыче учыр одиг гинэ овол. Туала вакытэ мер но экономика удысъесын шугъяськонъес кылдэмен валче, бадзым саклык висъяське ужась адямиослэсь эрикрадзэс утенлы. Судэ сизьым уголовной ужъес келямын, ваньмыз соос уждунэз дыраз тырмытэен герзаськемын. Эшшо кык сыче ужъес али следовательесын эскерисько на.
Автор/источник: Майя Бывальцева, «Мынам Удмуртие» радио.
|
|
|
|
|
|
 |
|
|
|
РЕКЛАМА
|
|
|
