МИлы 16

Таво тырö 16 во коми том йöзлöн асшöр котыр артмöмсянь. Сылысь чужан лунсö пасйöны йирым тöлысь помын. Пырöдчыштны кö котырлöн историяö, быть колö казьтыштны, мый 1990-öд вояс пансигöн Комиын вöлi том гижысьяслöн «Ордым» котыр, кöнi водзмöстчисны Евгений Козлов, Алексей Попов, Елена Козлова да мукöд. Сы бöрын, кыдзи 1991 воын Нина Нестерова да Александр Пивкин ветлiсны Эстонияö МАФУН (Молодёжная ассоциация финно-угорских народов – Фин-йöгра том войтырлöн öтувтчöм) Сöветлöн чукöртчöм вылö, найö öзйисны выль котыр восьтöм йылысь мöвпöн. Тадзи 1991 воын чужис енбиа томуловлöн коми шöрин («Коми центр творческой молодёжи» – КЦТМ). Котырö пырысьяс сувтöдiсны ас водзас ыджыд могъяс – сöвмöдны коми кыв да культура, кыпöдны том мортлысь аскылöмсö, лöсьöдны енбиалун сöвмöдöм могысь позянлунъяс.

Медводдза веськöдлысьöн сэки бöрйисны Александр Пивкинöс, кодi öнi зiльö Коми республикаса телевизионнöй каналын. Сэки выль котыр борд улö пырисны том туялысьяс, серпасалысьяс, гижысьяс, радио да телевидение вылын уджалысьяс, олöмсö бурланьö вежны кöсйысьяс. Татшöм öтувтчöмыс сетiс том йöзыслы позянлун петкöдчыны мукöд странаын да регионын уна сикас мероприятиеясын: МАФУН-лöн Конгрессъясын, серпасалысьяслöн, театрса ворсысьяслöн, сьылысьяслöн да гижысьяслöн фестивальясын, том туялысьяслöн конференцияясын и с.в.

1995 воын Сыктывкарын вöлi МАФУН-лöн III Конгресс. Фин-йöгра том войтырлысь ыджыд чукöртчöмсö дасьтiсны КЦТМ-ö пырысьяс. Сэки Ассоциацияса Президентöн кык во кежлö бöрйисны Комиысь Нина Нестероваöс.

Надзöникöн котырас локталiсны выль том йöз. Вежсисны и КЦТМ-öн веськöдлысьяс. Некымын во сыöн юрнуöдiс Светлана Белорусова, кодöс талун унджыкöн тöдöны кыдзи Россияса фин-йöгра культура шöринöн веськöдлысьöс. Сы бöрын недыр кад котырнас веськöдлiс Светлана Моисеева. Тайö кадколастас КЦТМ-ö пырысьяс зiлисны «Личность» нима конкурсын, «Сиктса аддзысьлöмъяс» уджтас олöмö пöртöмын, код серти том гижысьяс да серпасалысьяс тöдмöдiсны асланыс творчествоöн сиктын олысьясöс.

Коми том йöзлöн медыджыд шедöдöмторйöн позьö шуны IFUSCO конференция Россияö вайöм. IFUSCO либö войтыркостса фин-йöгра студентъяслöн конференция вöлi мунö быд во Рытыв Европаса да скандинавияса странаясын. 1999 воын тайö чукöртчöмыс медводдзаысь вöлi Сыктывкарын.

2004-öд вося урасьöм тöлысьсянь котырöн веськöдлан уджас босьтчис Людмила Камбалова. Öтсяма мöвпалысьясöс ас гöгöрыс öтувтны кужöмыс отсалiс котырыслы зумыда сувтны кок вылас да унатор вöчны коми кыв да культура видзöм-сöвмöдöмын. 2005 вося октябрын КЦТМ пыдди котырыс кутiс шусьыны мöд ногöн – Коми том войтырлöн «МИ» регионса общественнöй котыр. Сылöн лои выль устав, эмблема да девиз, кодi ышöдö томуловсö öтувтчыны, босьтны ас киас коми йöзлöн аскиа лун кузя кывкутöмсö да став уджсö вöчны öтвыв: «Ставыс МИ сайын» да «Ог кö МИ – кодi?»

Бöръя некымын вонас «МИ» котыр водзмöстчис томуловлы велöдан семинаръяс, коми кыв вылын республикаса «ШЕГ-турнир» да КВН (Коми войтыр нюмъялö) нуöдöмын. Том йöз водзö пырöдчöны коми войтырлöн быд вося районса да карса конференция да Съезд уджö, ёртасьöны том йöзлöн мукöд общественнöй котыркöд.

Тавося моз тöлысь 22-23 лунъясö «МИ» котырсалöн вынöн вöлi дасьтöма да нуöдöма МАФУНлысь VIII Конгресс, кöнi тайö Ассоциацияса выль Президентöн бöрйисны Öльöш Рассыхаевöс.

Моз тöлысьсянь жö «МИ» котырын выль веськöдлысь – Анна Пельмегова. Том йöзлöн водзö вылö выль мöвпъяс, выль кöсйöмъяс. Эм и верстьöяссянь отсöг, и асланыс вын да сям. Сiдзкö, бур туй «МИ» котырлы ассьыныс кöсйöмсö олöмö пöртiгöн!