|  |
Новости на национальных языках |
|
|
Кикутiсны
20.07.2007
Кага либö выль семья чужöм гижöны загсын. Медым гижöмыс эз мун гажтöма, а колис морт вежöрö век кежлö, районса загсын уджалысьяс зiльöны пыртны йöзкост творчествоысь юкöнъяс. А Петыр лунö кикутiсны жöника-невестаöс. Обрядсö нуöдiс загс юкöнöн веськöдлысь Лидия Жолобова.
Сiдз, кикутöм овлö сватайтчöм бöрын кöлысь водзвылын. Сватъяс пасьталiсны гöна кепысьяс, да чорыда кутлiсны öта-мöдыслысь кисö. Тайö пö, медым томъяс олiсны озыра. Вежань жöника-невеста дорысь омöльяссö вöтлалiс. Куимысь чышъянöн шондi паныд öвтыштiс. Невеста кöлысьöдз зэв жеб, восьса быд лёкыслы. Сы вöсна платтьö бöжладорас сылы пысалiсны булавка, а голяяс öшöдiсны маръямольысь сикöтш -вомидзлы видзöгъяс. Бать-мам ассьыныс челядьнысö бласлöвитiсны. Батьыс - гöгрöс чöвпанöн (каравай), мамыс - Божия Матерь öбразöн. Медбöрын жöника-невеста чунькытшасисны да окыштчисны. Сиам Настялы да Сергейлы бур олöм.
Кыдз висьталiс миянлы Лидия Борисовна, татшöм обрядсö важöн нин абу нуöдлöмаöсь. Бöръяысьсö пö кикутлiм 9 во сайын. Но важ коми обычайъяс серти кыпыда гижöны кагаясöс, юкöнъяс пыртöны гозъяöс гижигöн, кöлыссянь ыджыд юбилейъяс пасйигöн. Таво зарни кöлысьыс 6 нин вöлöма, а выль семьяыс 19 чужöма. Унаöн гижсьыны кöсйöны моз (ав-густ) тöлысьö. Лидия Борисовналöн кывъяс серти, öти лунö 4 кöлысьöдз лоö.
Автор/источник: «Выль туйöд»
|
|
|
|
|
|
 |
|
|
|
РЕКЛАМА
|
|
|
