|  |
Новости на национальных языках |
|
|
Мордовиянь Большеберезниковскяй районць аноклай васенце Международнай финно-угорскяй форумонь делегациять васьфтеманцты (мокшень)
11.07.2007
"Шумбрат, Финно-угрия!" Международнай васенце фестивальть пингста Мордовиянь Большеберезниковскяй району 20 июльста сай делегация Коми-Пермяцкяй автономнай округста. Тянь колга "Инфо-РМ" РИАти пачфтсь Мордовиянь Большеберезниковскяй муниципальнай райононь администрацияста культурань управлениять оцюняц Лилия Прохорова.
Делегацияса кармай улема 30 ломань, тяка лувксса Кудымкарскяй райононь Кечурского культурань кудонь "Бичир" ("Искра") фольклорнай ансамбльсь, Юсьвинскяй районнай культурань кудонь "Старики" эстраднай группась и Пермскяй краень "Мимикрия" театрась.
Лилия Прохоровать валса, Коми-Пермяцкяй округонь делегацияти аноклави эсь лацонь театрализованнай васедема. Районть границаса мордовскяй серма мархта нардамаса вельхтяф шрать лангс путовихть национальнай кухнянь танцтинят, поза, свадьбань перяка. Кить лангса делегация мархта автобусть лоткафтсазь и тердьсазь сембонь шра ваксс. Мордовскяй щамса стирьхне морайхть народнай морот.
"Тя ули васенце васедемась. Минь ератама тумс семботь сянь эзда, мезсь мольфни ни мяль, и анокламс инжихненди мяляфтови аф обычнай васедема", - мярьгсь Лилия Прохорова.
Шрать ваксста сембе туйхть Оцю Березникав, коса районнай Культурань кудонь куцемать лангса инжихне официальна васьфтевихть кшиса-салса. Культурань кудонь залса ладявихть ваномс тястоконь музеень экспонаттне. Сяльде делегациянь члеттненди азондови районть историянц колга: сембе велетнень, архитектурань памятникнень, содаф ломаттнень. Меле делегациясь туй экскурсияс районть эзга, инжихне ванцазь одс строяви объекттнень, тяка лувксса одс строяви храмть зданиянц.
Району визитть пингста Пермиси велеста национальнай идень коллективсь театрализованнай формаса тердьсыне инжихнень сценав, штоба синь содафтолезь пуромфнень эсь культураснон мархта.
Международнай финно-угорскяй форумонь участникненди Мордовиянь Большеберезниковскяй районца аноклайхть мяляфтови сувенирхт. Инжихненди казевихть равжа морендаф тумоста амулетт – павазонди. Тяфта жа ставихть галстукт, конатнень эса кармайхть улема российскяй флагть колма тюсонза: сенемсь, якстерсь и акшесь. Лангсост ули серматф: "Большие Березники – 2007".
"Мяленьке тиемс стане, штоба райононьконь колгалядольхть инь пара лятфнемат", - отмечазе Лилия Прохорова.
Автор/источник: РИА "Инфо-РМ"
См. также:
 Большеберезниковский район Мордовии готовится встретить делегацию первого Международного финно-угорского форума (рузонь)
|
|
|
|
|
|
 |
|
|
|
РЕКЛАМА
|
|
|
