Уло Мер валне илыше марий калык деке ÿжмаш!
19.04.2006
Поро кумылан, марий калыкем! Таче тендан деке мелын савырнен, ойпидышым шарем.
Акрет годымак шаланен пытыше марий-влакым иктеш чумырышо да пыдалын-арален налше Чумбылат-патыр марий коклаште кугу пагалымашым айлен. Кугу коча-кована-влак шке чоныштым почаш, вий-куатым йодаш, таумутым ойлаш Немда вÿд воктенысе кÿ курык деке вуйым саваш коштыныт. Тиде йÿла тачысе илышыштат шке вержым йомдарен огыл. Кажне ийын утыр да утыр виянеш, Чумбылат кумалтышыш шукырак да шукырак марий-влак тарванен толыт.
Тений, 2006 ийын пеледыш тылзын 30 кечынже (30 июнь) уло Мервалне илыше марий-влакым тиде кумалтышыш толаш ÿжына. Марий йÿланам, тукым вожнам, кугезе мландынам мондыман огыл. Марий-влак тÿрлö кундемыште илат: Россий мучкат, вес эллаштат. А Поро Немда Курык Кугызана мемнам иктеш ушен да ончыкыжат ушен шогаш тÿналеш. Чон ÿжмашдам колыштын, тиде курыкыш толаш тарваныза. Корныдам Поро Ош Кугу Юмо волгалтарен шогыжо!
Шернур кундемысе тÿн онаенже, «Марий Кумалтыш» погынын вуйлатышыже Мамаев Микал Славик.
Автор/источник: Kominarod.Ru
См. также:
 Чумбылат – национальный герой марийцев
| 
